1 Kings 7
1 所羅門也為自家起一座王宮，用十三年个時間正完工。
4 兩片个壁項各有三排窗門。
5 門框㧯窗門全部係四角形个。這片个三排窗門㧯該片个三排窗門相對。
6 佢又起圓柱大廳，長二十二公尺，闊十三公尺半，又搭一座有篷仔个走廊，用圓柱撐等。
7 佢又起寶座廳，另外喊做審判廳，係佢審判案件个地方。廳內對地枋到天花板全部係香柏樹料做个。
8 在審判廳後背个一個庭院肚有所羅門个間房；這間房也起到像其他个建築共樣。所羅門也為佢个𡜵娘—埃及公主起共樣个間房。
9 所有這兜建築㧯大院，對地基到屋簷，全部係用貴重个石頭起个，這兜石頭係對採石場照尺寸打出來、用鋸仔內外兩面整理過个。
10 地基係用品質盡好个大石頭鋪个，有三公尺半長个，也有四公尺長个。
11 在這頂高有照尺寸鑿成个石頭㧯香柏樹个樑。
12 無論大院、聖殿个內院、抑係上主聖殿个門廊全部有三層鑿好个石頭隔一層香柏樹樑个壁。
13 所羅門王派人去泰爾城喊戶蘭來。
14 厥爸係泰爾人，係鑄造銅器个師傅，總係已經死掉；厥姆係拿弗他利支族个人。戶蘭係非常聰明又有經驗个出名師傅；佢接受所羅門王个聘請，負責所有个銅器工程。
15 戶蘭鑄造兩支銅柱，逐支高八公尺，周圍五公尺三公寸。
16 佢也鑄造兩隻銅个柱頭，逐隻高兩公尺兩公寸，安在銅柱頂。
17 逐支銅柱頭安等一隻辮織个鍊仔圖形，
18 㧯兩排銅石榴遮等柱頭。
19 門廊个柱仔頂个柱頭高一公尺八公寸，形狀像百合花，
20 安在鍊仔圖形頂高。有兩百個石榴分兩排圍等逐支柱頂个柱頭。
21 戶蘭將這兩支銅柱頓在聖殿个入門口：南片該支喊做雅斤；北片該支喊做波阿斯。
22 百合花形狀个柱頭安在銅柱頂。恁樣，造銅柱个工程就完成了。
23 戶蘭鑄造一個圓个銅海，深兩公尺兩公寸，對這片到該片四公尺四公寸，周圍十三公尺兩公寸。
24 銅海邊堘个外背係兩排銅葫蘆，這兜銅葫蘆㧯銅海全部係用歸垤銅鑄造个。
25 銅海安在十二隻銅牛背囊頂；牛頭向外，三隻向東，三隻向西，三隻向南，三隻向北。
26 銅海賁七公分半，邊堘像杯仔个邊堘，刻有百合花个花瓣。銅海做得裝四萬公升。
27 戶蘭又鑄造十隻做得徙來徙去个銅盆座，逐座長一公尺八公寸，闊一公尺八公寸，高一公尺三公寸。
28 銅盆座係用四角形个鑲板造个；鑲板个邊堘係用框架來固定，
29 鑲板面頂有獅仔、牛牯㧯基路伯个像。框架外向，就係獅仔㧯牛牯个頂高㧯底下，刻等浮起來个花紋。
30 逐座有四隻銅輪仔，車心也係銅个。逐座底下有四支銅腳撐等，腳上刻等浮起來个花紋。
31 盆口最頂高有一隻圓框，高出銅座个最頂高四十五公分，俾銅座遮到个部份有十八公分，周圍全部有雕刻个圖案。
32 銅盆座个輪仔高六十六公分，在鑲板下背。車心㧯銅盆座全部係用歸垤銅鑄造个。
33 輪仔个樣式像戰車个輪仔；輪心、輪框、輪徑㧯車心全部係銅鑄造个。
34 逐座下背有四支腳撐等；這兜腳㧯銅盆座全部係用歸垤銅鑄造个。
35 逐座面頂有高起來二十二公分个圓圈仔。座个腳、鑲板㧯銅盆座全部係用歸垤銅鑄造个。
36 腳㧯鑲板刻有獅仔、棕樹㧯基路伯，周圍个框架刻等有浮起來个花紋。
37 十隻銅盆座就係恁樣鑄造个。逐座外形全部共樣，大細也共樣。
38 戶蘭又為銅盆座鑄造十隻銅盆；逐隻銅盆對這片到該片一公尺八公寸，做得裝八百公升。
39 佢將五隻銅盆座放在聖殿南片，另外五隻放在北片，將銅海放在聖殿个東南片。
46 這兜東西全部係照王个命令，在約旦平原、疏割㧯撒拉旦中央个鑄造場鑄造个。
47 所羅門王無喊人秤這兜銅器；因為數量當多，所以從來毋識算過該兜用品有幾重。
48 所羅門也喊人為上主个聖殿製造金器：有金壇、擺設供餅个金桌仔、
49 放在至聖所頭前个十隻純金燈臺(五隻在南，五隻在北)、金花、燈、火鉗，
50 㧯純金盆、燈心剪刀、碗、放香个碟仔、裝火炭个盆仔，並至聖所个門鉸仔㧯聖殿外門个門鉸仔。這兜用品全部係用金仔製造个。
51 所羅門王完成上主聖殿所有个工程，就將厥爸大衛獻給上主个金銀㧯其他用品全部放在聖殿个倉庫肚。